Singil sa bar exam, tataas

July 7, 2011 | 3:00 PM

TATAAS na ang singil sa bar exam simula ngayong taon.

Ito ay matapos aprubahan ng Supreme Court ang petisyon ng Bar Council na siyang humihiling na dagdagan ang bar fee.

Ito anila ay dahil na rin sa pagtaas ng presyo ng mga pangunahing bilihin at para ipangdagdag na rin sa pampa-suweldo sa mga ilang tauhan nito.

Kaya mula sa dating 2,750 ay magiging 3,000 na ang bayarin sa bar examination kabilang na ang admission fee.

Una nang inanunsyo noong Enero ng Korte Suprema na simula ngayong taon ay ililipat na sa University of Sto. Tomas ang lugar na pagdarausan ng bar examinations at mula naman sa buwan ng Setyembre gagawin na ito tuwing Nobyembre.

www.rmn.com.ph

Read more »

Bagong ombudsman, posibleng tukuyin ni P-Noy sa kanyang nalalapit na State of the Nation Address

July 7, 2011 | 3:00 PM

INAASAHANG may itatalaga nang ombudsman si Pangulong Benigno Aquino III bago ang kanyang State of the Nation Address sa July 25.


Ito ang pagtataya ni House Committee on Justice Chairman Rep. Niel Tupas Jr. . Kinumpirma nito na ibinigay na nila at ngayon ay hawak na ng Pangulong Aquino ang shortlist ng mga nominado para sa susunod na ombudsman.

Ayon kay Tupas, kabilang sa listahan sina dating Supreme Court Associate Justice Conchita Carpio-Morales, dating Justice Secretary Artemio Tuquero, Justice Usec. Leah Armamento at Presidential Commission on Good Government Commissioner Gerard Mosquera.

Nabatid na mayroong siyamnapung araw ang pangulo para makapagdesisyon kung sino ang kanyang itatalagang bagong ombudsman, simula nang magbitiw si Merceditas Gutierrez.

Kasabay nito, sinabi ni Tupas na sa tingin niya ay nangunguna pa rin sa pagpipilian ng pangulo si Carpio-Morales.

Matatandaang kay Carpio-Morales nanumpa si P-Noy noong nakaraang taon.

www.rmn.com.ph

Read more »

Isyu ng pagpapababa ng interconnection charge sa cellphone, dedesisyunan ng NTC ngayong Hulyo o Agosto

July 7, 2011 | 12:00 NN

Pipilitin ng National Telecommunications Commission (NTC) na tapusin ngayong buwan o hanggang sa Agosto ang usapin hinggil sa panukalang bawasan ang interconnection charges sa tawag at text sa cellphone.

Sinabi ni NTC Common Carriers Authorization Department Engr. Edgardo Cabarios na binigyan nila hanggang Lunes ang mga telecommunications company upang makapagsumite ng kanilang position paper sa nasabing panukala.
Dito aniya makikita ang kanilang argumento kung pabor o laban sa nasabing panukala.

Sa harap nito, desidido naman ang NTC na ituloy ang pagpapatupad ng pagpapababa ng singil sa interconnection charge. Napapanahon na aniya ito, kung saan makikinabang ang mga cellphone user.

www.dzmm.com.ph

Read more »

SC, inatasan ang DAR na magsagawa ng bagong referendum sa Hacienda Luisita farmers

July 6, 2011 | 3:00 PM

Inatasan ng Korte Suprema ang Department of Agrarian Reform o DAR na magsagawa ng bagong referendum sa mga farmer-beneficiaries ng Hacienda Luisita Incorporated kung saan papipiliin ang mga ito ng gusto nila ng lupa o kung gusto ng stocks ng naturang hacienda.

Sa isang press conference, inihayag ni Supreme Court Spokesperson at Court Administrator Justice Midas Marquez na sa desisyon ng Korte Suprema, 10 mahistrado ang pumayag sa ginawang pagpapawalang-bisa ng Presidential Agrarian Reform Council sa stocks distribution plan ng Hacienda Luisita Incorporated.

Anim aniya sa 10 mahistrado ang mas pumabor na isailalim ang naturang usapin sa referendum kung saan papipiliin ang may 6,296 farmer-beneficiaries kung gusto nila ng stocks o kung gusto nila ng lupa.

Apat naman ang may opinyon na dapat isailalim ang lupain ng Hacienda Luisita sa land reform dahil sa pinawalang-bisa na ang stocks distribution plan.

Para naman kay Chief Justice Renato Corona, labag sa Konstitusyon ang Republic Act 6657 o batas na nagbibigay-karapatan sa may-ari ng hacienda na magbigay na lamang ng stocks option.

Katwiran ni Corona, ang land reform ay dapat na may aktuwal na pamimigay ng lupain.

www.dzmm.com.ph

Read more »

Isang mambabatas, nanawagang gumamit na lamang ng produktong Pinoy…

July 6, 2011 | 12:00 NN

HINIHIKAYAT ni Bayan Muna representative Teddy Casino na tangkilikin na lamang ng mga Pilipino ang produktong Pinoy kesa sa mga imported na hindi sigurado kung ligtas ba ang mga sangkap o nakapaloob dito.

Ito ay matapos na matagpuan ang mga soy sauce na ibinibenta sa merkado na galing sa ibang bansa na napag-alaman sa pagsusuri na nakakakanser ito.

Sa isang advisory, tinukoy ni Food and Drug Administration director Suzette Lazo ang sinasabing carcinogenic chemical na 3 monochloropropane-1, 2-diol o 3-MCPD, isang by-product ng soy sauce manufacturing na gumagamit ng hydrolyzed vegetable protein bilang ingredient.

Subalit, siniguro naman ni Lazo ang publiko na ang toyong ibinebenta ng local manufacturers at distributors ay naka-rehistro sa FDA at ligtas kainin.

Nanawagan pa ang chairman ng House Committee on Small Business and Entrepreneurship Development sa mga consumers, businessmen at entrepreneurs, labor groups, civil society organizations at iba pang sektor na suportahan ang Filipino industry para makatulong na rin sa pagbigay ng trabaho sa mga kababayan.

www.rmn.com.ph

Read more »