Saturday, July 16

Tourist arrival ng bansa, tumaas, ayon sa DoT

July 16, 2011 | 3:00 PM

BAHAGYANG tumaas ang tourist arrival ng mga dayuhang turista sa bansa sa unang limang buwan ng taong kasalukuyan ayon sa Department of Tourism (DoT).
 
Sinabi ni DoT Sec. Alberto Lim na higit 12% o katumbas ng 1.6-milyong turista ang itinaas ng tourist arrival sa bansa mula Enero hanggang Mayo.

Bunga nito, kumpiyansa ang kalihim na makakamit ng DoT ang target nitong 3.74 milyong tourist arrival sa bansa para sa taong 2011.

Kabilang naman sa mga bansang may maraming turistang dumadayo sa Pilipinas ay mula sa South Korea, Estados Unidos at Japan.

www.rmn.com.ph

Isang brand ng mouthwash, ni-recall sa mga pamilihan

July 16, 2011 | 12:00 NN

PINAYUHAN ng Food and Drugs Administration ang publiko na makipag-ugnayan sa kanilang tanggapan kung nakabili man o nakagamit ng Oral-B Tooth and Gum Care Alcohol Free Mouth Rinse.


Ito'y matapos boluntaryong pina-recall ng Procter and Gamble Philippines Incorporated (P&G) ang isang batch ng nasabing produkto dahil sa nakitang mikrobyo dala ng kontaminasyon.

Dahil dito ay pinaalalahanan ni FDA Acting Director Suzette Lazo ang mga mamamayan na huwag nang bilin ang naturang produkto dahil posible itong makaapekto sa taong mayroong mababang immune system.

Nabatid na ang nasabing mouthwash ay ginawa at nagmula sa Retycol, Columbia.

www.rmn.com.ph

Friday, July 15

Mga may kapansanan, muling pinaalalahanan ng Comelec na magparehistro na para sa 2013 elections

Muling pinaalalahanan ng Commission on Elections (Comelec) ang mga may kapansanan na magparehistro sa Lunes, Hulyo 18 hanggang sa Sabado, Hulyo 23 para sa halalan sa 2013.

Sinabi ni Comelec Spokesperson James Jimenez na ang naturang mga petsa ang pinakamainam na panahon para magparehistro o magpa-revalidate ang mga persons with disability PWD.

Bukod sa pagpaparehistro, aalamin din ng Comelec ang lahat ng pangangailangan ng mga may kapansanan para mabigyan sila ng full assistance sa halalan.

Inihayag ni Jimenez na mayroong mga itatayong special registration center ang Comelec sa ilang malls para madaling makapunta ang mga may kapansanan at pati ang mga kasama nito ay maaari ring magparehistro.

Nasa 50,000 hanggang 100,000 registrants na PWD ang inaasahan ng Comelec sa buong bansa.

Pacquiao, panalo sa ESPY Fighter of the Year award

July 15, 2011 | 12:00 NN

Nasungkit ni Manny Pacquiao ang panalo sa Excellence in Sports Performance Yearly o ESPY Fighter Award na iginagawad ng ESPN.

Iginawad kay Manny Pacquiao ang ESPY Fighter Award dahil sa matagumpay niyang laban kina Sugar Shane Mosley noong Mayo at Antonio Margarito noong nakaraang taon.

Tinalo ni Pacquiao para sa parangal na ito ang ilan pang nominado gaya nina future Hall of Famer Bernard Hopkins, UFC light heavyweight champion Jon Jones, at welterweight titlist Georges St. Pierre.

Si Pacquiao na eight-time world division champion ay unang nakakuha ng ESPY Award noong 2009.

Sinimulan ng ESPN ang pagbibigay ng parangal sa mga individual at team athletes noong 2007 kung saan una nilang pinarangalan si American Undefeated Boxer at kritiko ni Pacquiao na si Floyd Mayweather, Jr.

www.gmanews.tv (edited)

Thursday, July 14

DTI-NE, naghahanda na para sa Diskwento Caravan

July 8, 2011 | 12:00 NN

Kasalukuyan nang naghahanda ang Department of Trade and Industry Nueva Ecija Provincial Office para sa pagtulak ng Diskwento Caravan na magaganap maghapon bukas sa Freedom Park, Cabanatuan City.


May 35 exhibitors ang inaasahang makikiisa sa Diskwento Caravan. Magbibigay din ng libreng gupit at masahe ang Provincial Manpower Training Center. Nakahanda naman ang DTI NERBAC Team na tulungan ang mga negosyante sa kanilang pangangailangan gaya ng pagproseo ng DTI Permit, SSS, at iba pa.

Layunin ng Diskwento Caravan na maihatid sa mga consumers ang de-kalidad na produkto na kanilang mabibili sa mas murang halaga tulad ng gamot, tinapay, canned goods, processed meat products, detergents, tsinelas at marami pang iba.


Bagamat magbubukas na ang mga exhibitor ng ala-sais y media ng umaga, pormal na sisimulan ang Diskwento Caravan sa pamamagitan ng isang programa ganap na alas-9 ng umaga.

Ang imbitasyong ito ng DTI na dumalo at mamili sa Diskwento Caravan ay bukas para sa lahat.

BiG SOUND & DZXO Newsteam

Twitter Delicious Facebook Digg Stumbleupon Favorites More

 
Design by Free WordPress Themes | Bloggerized by Lasantha - Premium Blogger Themes | Walgreens Printable Coupons