Kampanya kontra wang-wang, ipagpapatuloy ni PNoy

July 26, 2011 | 12:00 NN


Sumentro sa pagbabago ang ikalawang State of the Nation Address (SONA) ng Pangulo kung saan binalikan niya ang naging epekto ng pagbabawal sa paggamit ng wangwang na nagbigay daan para mahinto na ang umano'y pag-abuso at mga katiwalian ng tinawag niyang mga utak wang-wang noong nakaraang administrasyon.

Inihalimbawa ng Pangulo ang pagbili ng helikopter sa presyong brand new gayong gamit na gamit na pala at ang milyon-milyong pabuya na tinanggap ng mga opisyal ng Government Owned and Controlled Corporation (GOCC), ang pagpapatigil ng dredging sa Laguna Lake at ang food-for-school program na bara-bara lang ang paghahanap ng benepisyaryo. 

Ibinunyag din niya ang ilang anomalya gaya ng P1 bilyong nagastos umano ng Philippine Amusement and Gaming Corporation (PAGCOr) para lang sa kape.

Ipinagmalaki rin naman ng Pangulo ang mga nagawa na ng kanyang administrasyon sa isang taong panunungkulan.

Kabilang dito ang nabawasang bilang ng mga pamilyang nagugutom, pagbaba ng bilang ng mga Pilipinong walang trabaho, at ang pagbabalik na ng kumpiyansa ng mga namumuhunan sa energy sector.

Inisa-isa rin niya ang pabahay na naipamahagi sa mga pulis at sundalo na palalawakin na maging sa Visayas at Mindanao at target na ring mabiyayaan maging ang mga tauhan ng Bureau of Fire Protection (BFP) at Bureau of Jail Management and Penology (BJMP).

Binanggit din niya ang nabiyayaan na ng Pantawid Pamilyang Pilipino Program o Conditional Cash Transfer na ipinatutupad ng Department of Social Welfare and Development (DSWD), ang mga nagawa ng Department of Public Works and Highways (DPWH) at ng PAGASA sa pagbibigay ng maaasahang mga babala.

Hindi na rin aniya aasa sa pag-angkat ng bigas ang bansa dahil sa mataas na ani ng palay.

Ibinida rin ng Pangulo ang pagkilala ng ibang bansa sa nagawa ng administrasyon gaya ng apat na beses na pag-upgrade ng credit ratings ng Pilipinas, dahilan para lumiit ang interes ng binabayarang utang at ang pagkakatanggal ng bansa sa Tier 2 watchlist ng trafficking in persons report ng Amerika.

Sa kanyang 58 minutong SONA, 50 beses pinalakpakan ang Pangulo, pinakamalakas nang ianunsyo niya ang paghirang kay retired Supreme Court Justice Conchita Carpio-Morales bilang bagong Ombudsman at ang isyu ng Spratlys.

www.dzmm.com.ph

Read more »

Bagyong Juaning, tropical storm na (UPDATE)

July 26, 2011 | 12:00 NN

NAGING tropical storm na ang bagyong Juaning.


Ayon kay DOST-PAGASA usec. Graciano Yumul lalu pang lumakas at bumilis ang bagyong Juaning kung saan malaki ang posibilidad na lumihis ang bagyo.

Aniya, kung walang pagbabago sa direksyon ang bagyong Juaning na west northwest ay tatama ito sa Aurora Isabela.

Gayon pa man ay sinabi rin ni Yumul na may posibilidad pa ring magbago ang direksyon nito papuntang west north kung saan tatama ito sa Central Luzon at makakaapekto sa Metro Manila.

Nasa signal no. 2 na ang Kabikulan, kabilang ang Cataduanes, Camirines Sur, Camarines Norte at Albay habang nasa signal no. 1 pa rin ang Northern Luzon.

Samantala, bukod sa buong Bicol at Lipa, kinansela na rin ang klase sa mga pampubliko at pribadong paaralan mula kinder hanggang high school sa National Capital Region.

www.rmn.com.ph

Read more »

Team Azkals, dumating na sa bansa

July 25, 2011 | 3:00 PM

Dumating na sa bansa ang Philippine Azkals kagabi mula sa naging laban nila sa Kuwait.

Mahaba ang naging biyahe ng grupo dahil mula Kuwait, dumaan muna sila ng Dubai at muling bumiyahe ng siyam na oras hanggang Maynila.
 
Magpapahinga muna ang team ngayong araw at pag-aaralan ang nakaraan nilang laban saka muling sasabak sa ensayo para sa muli nilang paghaharap ng Kuwait sa Huwebes, Hulyo 28 sa Rizal Memorial Stadium sa Maynila.

Determinado ang Philippine team na manalo at buo ang kanilang pag-asa dahil makakapaglaro na sina Stephan Schrock at team captain Aly Borromeo.

Nasa bansa na rin naman ang team Kuwait na aminadong nahirapan sa Azkals pero determinado umano silang muling talunin ang koponan ng Pinoy.

www.dzmm.com.ph

Read more »

Minorya, hindi tiyak kung marami ang pupunta sa kanila sa SONA

July 25, 2011 | 3:00 PM

HINDI naman sigurado ang minorya kung ang lahat ba ng miyembro nila ay dadalo sa SONA ni pangulong Benigno Aquino III ngayong araw.
 
Ayon kay deputy minority leader at Zambales rep. Mitos Magsaysay bagamat tiyak na dadalo siya sa SONA at kahit pa hindi nabibigay sa kanila ang pork barrel ay hindi naman masabi kung ang lahat ba sa minorya ay pupunta dito.

Aniya, may kanya-kanya naman kasing desisyon ang bawat isa at dahilan kung sakaling hindi makadalo upang saksihan ang ulat ng pangulo sa bayan.

Mahalaga aniya ay marinig ng publiko kung ano ba ang mga na-accomplished na gawain ng pangulo sa loob ng isang taon at mga plano nito sa bansa sa kanyang ikalawang taon bilang pangulo.

Sa panig ng minorya, tanging si Pampanga rep. Gloria Arroyo lamang ang nagpaabiso na hindi na pupunta sa SONA ni PNoy.

Mapapakinggan ng live ang State of the Nation Address ni Pangulong Benigno "Noynoy" Aquino III sa simulcast broadcast ng 101.5 BiG SOUND fm at 1188 DZXO am.


www.rmn.com.ph

Read more »

PNoy, hindi magpapa-impress sa SONA

July 25, 2011 | 12:00 NN

WALANG planong magpa-impress si pangulong Benigno Noynoy Aquino III.



Ito ang bwelta ng Malakanyang hinggil sa mga binabatong isyu na puro pambobola lang ang sasabihin ni pangulong Aquino sa kanyang State of the Nation Address mamaya.

Giit pa ng Malacañang bahala na ang mga boss ni PNoy na humusga sa bigat at saysay ng sasabihin ni pangulong Aquino.

Nilinaw din ni deputy presidential spokesperson Abigail Valte gusto lang i-report ni PNoy ang totoong estado ng bayan.

Kinumpirma naman ni presidential Communications Group secretary Ricky Carandang na mas mahaba sa karaniwang speech ni pangulong Noynoy ang kanyang State of the Nation Address.

Sinabi ni Carandang na “pagbabago” o "social transformation" ang tema ng SONA dahil hangad ng pangulo na sumulong na ang bansa.

Wait and see naman si Carandang sa mga balitang ipapakilala na ni PNOY ang bagong ombudsman sa SONA.

Samantala, ayon kay Carandang, naiintindihan ng Malakanyang ang hindi pagdalo ni dating pangulong Gloria Arroyo sa SONA dahil aniya wala namang sinuman ang gustong nakaharap habang binabatikos sa talumpati.

www.rmn.com.ph

Read more »