POEA, may babala sa health workers kaugnay ng email scam

Pinag-iingat ng Philippine Overseas Employment Administration (POEA) ang lahat ng health workers na nangangarap magtrabaho abroad partikular na sa United Kingdom (UK) laban sa bagong modus na idinadaan sa Internet.

Laman ng email scam ang pangakong makapagtatrabaho ang mga nurse at caregiver sa isang malaking ospital sa UK kapalit ang paunang bayad na P3,000 para sa pekeng British English training.

Ayon kay POEA Chief of Operation and Surveillance Division Atty. Celso Hernandez, umabot na sa halos 100 health workers ang naloloko ng ganitong modus, kaya nagbabalang huwag makipag-transaksyon sa Internet.

Para matiyak ang mga lehitimong alok na trabaho abroad, sumangguni sa POEA hotlines (02) 722-1144 o (02) 722-1155 o kaya'y bisitahin ang kanilang website www.poea.gov.ph.

Read more »

Magnitude 7.2 na lindol sa Turkey, 138 na ang patay

Umakyat na sa 138 ang bilang ng mga namatay sa magnitude 7.2 na lindol na tumama sa Eastern Turkey Linggo ng hapon.

Iniulat ni Turkish Prime Minister Recep Tayyip Erdogan na 93 ang nasawi sa lungsod ng Van, 45 sa bayan ng Ercis at nasa 350 ang sugatan. Marami pa rin aniya ang naiipit sa mga bumagsak na gusali.

Batay naman sa report ng Turkish Red Crescent, nasa 80 gusali ang nagiba sa Ercis kabilang ang isang dormitoryo at 10 sa Van kaya pinangangambahang tataas pa ang bilang ng mga nasawi.

Pinayuhan na ang mga residente na lumikas sa kanilang mga napinsalang bahay dahil tuloy-tuloy pa rin ang mga pagyanig kung saan nakapagrekord na ang United States scientists ng mahigit 100 aftershocks, pinakamalakas ay magnitude 6.0.

Dahil dito, nagpalipas na lamang ng magdamag sa mga itinayong tent ang mga apektadong residente habang ang iba'y tumuloy sa kanilang mga kaanak sa mga katabing lugar.

Tuloy-tuloy naman ang isinasagawang rescue efforts ng mga otoridad.

Read more »

604 buses, nag-apply na ng special permit para makabiyahe sa lalawigan sa Undas

Isang linggo bago mag-Undas, umabot na sa 604 ang mga yunit ng bus na nag-aplay para sa special permit upang makabiyahe sa mga lalawigan.

Sinabi ni Lilia Ocampo, officer-in-charge ng Technical Evaluation Division ng Land Transportation Franchising and Regulatory Board o LTFRB na susuriin muna nila at ng Land Transportation Office  ang road worthiness ng mga yunit ng bus bago pagkalooban ng special permit.

Ayon kay Ocampo, lalagyan na rin ng LTFRB ng fare guide ang lahat ng bus unit na bibiyahe sa iba't ibang probinsya para alam ng mga pasahero kung nagkakaroon ng overcharging ang mga kumpanya ng bus sa panahon ng Undas.

Paalala ng LTFRB, hanggang ngayong araw na lang ang aplikasyon ng special permit para sa mga bus na bibiyahe sa Undas.

Read more »

Blood letting ng JANE, tagumpay

Naging matagumpay ang blood letting program na pinangunahan ng Japan Association of Novo Ecijanos o JANE na ginanap sa Fort Magsaysay kahapon.

Sa temang “Healthy People Care, Healthy People Donate Blood” nakakulekta ang JANE ng 65 bags ng dugo mula sa iba’t-ibang grupo ng donors gaya ng Kapisanan ng mga Broadcaster ng Pilipinas Nueva Ecija Chapter, mga guro ng Zaragosa National High School at Nueva Ecija National High School, 81^st Infantry Battalion, 7^th Infantry Division, Reservists of Nueva Ecija, Bankers Club of Cabanatuan City, Nueva Ecija Police Provincial Office at NIA Nueva Ecija Division 3.

Read more »

Libyans, nagbubunyi sa pagkamatay ni Gadhafi; UN, nanawagan ng pagkakaisa

Patuloy ang pagbubunyi ng mga Libyan sa pagkamatay ni Moammar Gadhafi na 42 taon ding naghari sa kanilang bansa.

Naglabasan at nagdiwang sa central Marty's square at sa mga lansangan ng Tripoli ang mga residente nang mabalitaang nahuli at napatay na si Gadhafi.

Una nang natimbog si Gadhafi habang nagtatago sa drainage culvert sa Sirte matapos tirahin ng NATO Forces ang convoy nito habang papalabas sa kaniyang hometown.

Sa report ng Reuters, pinagbubugbog ng mga Libyan fighter si Gadhafi saka binaril sa ulo.

Kasama ring napatay ang anak niyang si Mo'tassim at dating Defense Minister Bakar Yopunis Jaber.

Dalawang buwan ding nagtago si Gadhafi matapos makontrol ng Libyan rebels ang Tripoli.

Umabot na ng walong buwan ang pag-aaklas ng Libyans sa pamamahala ng 69 anyos na lider na nauwi sa civil war.

Nagkakaisa naman ang mga lider ng iba't ibang bansa sa pagsasabing ang pagkamatay ni Gadhafi ay pagtatapos na rin ng diktadurya sa Libya.

Agad ding nanawagan si United Nations Secretary-General Ban Ki-moon para sa pagkakaisa at reconciliation sa Libya at kailangan aniyang isuko na ng mga tagasuporta ni Gadhafi at ng mga Libyan rebels ang kanilang mga armas.

Nangako si Ban na susuportahan ng UN ang transitional leaders sa pagbuo nito ng bagong nasyon.

Read more »