PNoy, binigyang-pugay ang naging ambag ni Tandang Sora sa bansa

Binigyang-pugay ni Pangulong Benigno "Noynoy" Aquino III ang naging ambag sa bansa ng bayaning si Melchora Aquino o Tandang Sora kaugnay ng paggunita ngayong araw sa ika-200 kaarawan nito.

Sa kanyang talumpati, kinilala ng pangulo ang naging ambag ni Tandang Sora upang tulungan ang mga katipunero.

Ayon sa pangulo, sa kabila ng edad nito na 84 at walang armas, nagawa nitong makapag-ambag para makamtan ang kalayaan ng bansa.

Hinimok din ni PNoy ang mga kababayan natin na huwag kalimutan at isabuhay ang naging kabayanihan ni Tandang Sora at gampanan ang ating mga tungkulin para sa kapakanan ng bansa.

Matapos ang talumpati ng pangulo, be-bendisyunan ni Novaliches Bishop Antonio Tobias ang bagong puntod ni Tandang Sora at urn na dadalhin sa crypt ng Bagong Tandang Sora Shrine sa Banlat, Quezon City.

Read more »

DOT, inilabas na ang bagong tourism campaign ng Pinas; Bagong kampanya, worldwide trending topic sa Twitter

Pormal nang inilabas ng Department of Tourism ang campaign slogan ng bansa upang mas makahikayat pa ng mga turista, lokal man o dayuhan.

Sinabi ni Tourism Secretary Ramon Jimenez na tatawaging "It's More Fun in the Philippines" para sa mga dayuhan at  "Number 1 for Fun" naman ang kampanya para sa mga lokal na turista.

Dagdag ni Jimenez, sesentro ang kampanya hindi lamang sa magagandang tanawin sa bansa bagkus pati na rin ang maaaring gawin sa bansa bilang turista.

Binibigyang-diin ng kampanya ang simple ngunit makatotohan at magagandang asal ng mga Pilipino.

Samantala, nagkaisa ang mga Pinoy social media users upang i-promote ang pinakabagong tourism advocacy ng Pilipinas.

Sa kasalukuyan, number one trending topic sa Twitter ang hashtag... ItsMoreFunInThePhilippines.

Umaasa naman ang mga Pilipino na magiging matagumpay ang kampanyang ito upang mapalakas ang turismo at imahen ng bansa.

Read more »

PNP, inihahanda na ang seguridad para sa 'Simbang Gabi'

Pinaghahandaan na ng Philippine National Police (PNP) ang ilang security measures para sa taunang "Simbang Gabi" na magsisimula sa December 16.

 

Naglabas ang PNP ng Letter of Instruction 42-2011, isang listahan kung saan nakasaad ang ilang patnubay upang masiguro ang kaligtasan ng publiko sa mga lugar na diradayo ng mga tao, kabilang na ang mga simbahan.

 

Inutos na rin ni PNP chief Director General Nicanor Bartolome ang pagkakaroon ng dagdag alerto sa Metro Manila at Cordillera at pati na rin sa national headquarters at mga national support unit.

 

Inulit ni Bartolome ang utos nitong full alert status sa Regions 9, 10, 11, 12, 13, ARMM at Special Action Force troopers matapos ang naganap na pambobomba sa Mindanao.

 

Milyon ang inaasahang dadalo ng Simbang Gabi, itinuturing isa sa mga natatanging tradisyon ng mga Pilipino tuwing pasko.

 

Siyam na araw simula December 16,  dadalo ang mga Pilipinong Katoliko sa mga simbahan bago mag-umaga bilang novena.

 

Nagtatapos ang Simbang Gabi sa Misa de Gallo, ang misa na magaganap ng Bisperas ng Pasko.

Read more »

Brown rice, malapit nang isama sa menu ng mga fastfood chain

Malapit nang maisama sa menu ng ilang kilalang fastfood chain ang "brown rice" o "unpolished rice".

Ayon kay Philippine Rice Research Institute (PhilRice) National Rice Awareness Coordinator Ella Lois Bestil, konting panahon na lamang ang bibilangin at iaalok na rin ang mas masustansyang brown rice sa mga sikat na kainan bukod sa karaniwan nang maputing kanin.

Sinabi ni Bestil na kabilang sa mga tinatarget ng PhilRice para maghain ng brown rice sa mga parokyano nito ang mga fastfood chain at restaurant.

Aniya, puspusan silang nakikipag-ugnayan sa mga may-ari ng iba't ibang fastfood chain upang mai-promote ang brown rice sa publiko dahil sa mas mataas na taglay nitong bitamina at fiber na higit na mainam sa kalusugan ng tao.

Gayundin, patok din ang brown rice sa mga nagpapapayat dahil siksik ito sa dietary fiber, hindi tulad ng karaniwang kanin.

Bagama't medyo may kamahalan pa rin ang presyo ng brown rice kumpara sa puting kanin, mas magiging mura rin ito kapag tinangkilik na ng publiko.

Read more »

'Longest coin line' world record, nasungkit ng Pilipinas

Tagumpay na nabuwag ng Pilipinas ang rekord ng Amerika na may pinakamahabang linya ng barya.

Nakatakda nang tanghalin ang Pinas sa Guinness' Book of World Records bilang bansang may "longest coin line".

Umabot sa 68  kilometro ang linya ng mga bente singko sentimos na mas mahaba sa 64.88 kilometers na world record ng Amerika.

Nasa 3.5 milyong piraso ng mga bente singkong barya ang nilatag sa Quirino Grandstand sa Maynila.

Sa kabuuan, nagkakahalaga ito ng P850,000.

Kukunin ng Bangko Sentral ng Pilipinas (BSP) ang mga barya at papalitan ng perang papel, na siyang ibibigay sa Deparment of Education (DepEd) bilang donasyon sa pagpapagawa ng mga classroom.

Read more »