Kahandaan laban sa pagpasok ng 15 bagyo ngayon taon sa bansa, tiniyak

June 22, 2011 | 12:00

TINIYAK ng National Disaster Risk Reduction and Management Council o NDRRMC na nakahanda ang kanilang tanggapan hinggil sa 15 bagyong posibleng pumasok pa sa bansa ngayon taon.

Ayon kay NDRRMC Exec. Dir. Benito Ramos, nakaantabay na ang kanilang mga Disaster Reponse Team, katuwang ang Local Government Units (LGU), maging ang Department of Social Welfare and Development (DSWD), Armed Forces of the Philippines (AFP) at Department of Health (DoH) upang magbigay ng ayuda.

Kaugnay rito, inihayag ni DSWD Secretary Dinky Soliman na mayroon ng pondo ang mga lokal na ahensya para sa mga relief goods at non-food items upang ibigay sa mga sinalanta ng bagyo, gayundin sa mga residente sa Cotabato at Maguindanao na nakakaranas ng matinding pagbaha.

Nagbabala naman si Ramos sa mga residente sa bahagi ng Borongan Eastern Samar na maging alerto dahil posibleng ito ang tumbukin ng bagyong Falcon.

www.rmn.com.ph

Read more »

4 panukalang batas, nilagdaan na ni Pangulong Aquino

June 21, 2011 | 3:00 PM

Apat na panukalang batas ang nilagdaan ni Pangulong Benigno Simeon Aquino III ngayong araw.

Nilagdaan na ni Pangulong Aquino ang batas na magpapalawig sa lifeline rate privilege ng Electric Power Industry Reform Act (EPIRA) na layong bawasan ang hirap sa pagbabayad sa kuryente sa mga low income family.

Nilagdaan na rin ng Pangulo ang pagpapalawig ng Joint Congressional Power Commission upang tiyakin ang healthy competition sa power sector.

Pinirmahan na rin niya ang batas na magbibigay ng patas na employment opportunity sa mga babaeng nagtatrabaho sa gabi gayundin ang mandatory basic immunization services para sa mga batang hindi lalampas ng limang taong gulang kontra Hepatitis B.

Ang paglagda sa apat na panukalang batas ay sinaksihan nina Senate President Juan Ponce Enrile, House Speaker Feliciano Belmonte, kasama ang iba pang mga senador at kinatawan.

Sinabi ng Pangulo na hindi pa siya kuntento sa mga nilagdaan niyang batas dahil hindi pa rito nagtatapos ang trabaho ng administrasyon para resolbahin ang mga problema ng bansa.

Read more »

Low Pressure Area sa bahagi ng Visayas, isa nang ganap na bagyo

June 21, 2011 | 2:00 PM

Isa nang ganap na tropical depression ang Low Pressure Area (LPA) na namataan sa Silangang Bahagi ng Visayas at tatawagin na itong Bagyong "Falcon".

Batay sa weather bulletin ng PAGASA, namataan ang sentro ni Falcon sa layong anim na raan at pitumpung  kilometro sa Silangan ng Boronggan, Eastern Samar.

Taglay nito ang lakas ng hangging umaabot ng 55 kilometro kada oras malapit sa gitna at kumikilos pa-Kanluran Hilagang-Kanluran sa bilis na labing siyam na kilometro kada oras.

Wala namang nakataas na babala ng bagyo sa alinmang bahagi ng bansa.

Read more »

Tropical Depression Egay, palabas na ng bansa; panibagong sama ng panahon, inaasahang papasok bukas

June 20, 2011 | 5:00 PM

Inaasahang lalabas na ng bansa ang Tropical Depression "Egay" ngayong hapon o bukas ng umaga.

Sinabi ni PAGASA Weather Forecaster Aldczar Aurelio na kaninang alas 10:00 ng umaga, namataan ang sentro ng tropical depression may dalawang daan at limampung kilometro sa Hilagang Kanluran ng Aparri, Cagayan.

Taglay pa rin nito ang lakas ng hanging umaabot sa limampu’t limang kilometro bawat oras malapit sa gitna at patuloy na kumikilos ng pa-Kanluran Hilagang Kanluran sa bilis na labingpitong kilometro bawat oras at inaasahang tatama sa China.

Nakataas pa rin ang signal number one sa Calayan, Babuyan at Batanes Group of Islands at Ilocos Norte.

Inihayag ni Aurelio na malakas ang hangin sa West Philippine Sea kaya posibleng malusaw si Egay paglapit nito sa China.

Habang papalayo naman si Egay, patuloy nitong hihigupin at pinalalakas ang hanging habagat na magpapaulan sa Western section ng Luzon kabilang ang Palawan, Mindoro, Pangasinan, Zambales at Bataan kasama na ang Metro Manila.

Sa taya ni Science and Technology Undersecretary Graciano Yumul, gaganda ang panahon sa Visayas at Mindanao sa Miyerkules.

Dagdag pa niya, inaasahang papasok ang namumuong sama ng panahon bukas ng umaga o sa Miyerkules at tatawagin itong "Falcon".

www.dzmm.com.ph

Read more »

Mas mataas na produksyon ng palay ngayong taon, inaasahan ng DA

June 20, 2011 | 5:00 PM

INAASAHAN ng Department of Agriculture na mas matataasan pa nito ang target na produksyon ng palay na 17.5 million metric tons ngayong taon, kung makiki-ayon ang magandang panahon.

Ayon kay Agriculture Secretary Proceso Alcala, mainam sa mga palay ang ma-araw na panahon at paminsan-minsang pag-ulan, kaya naman posible aniyang umabot sa 7.6 milyong tonelada ang magiging ani sa unang kalahati ng taon.

Samantala, balak na rin ng DA na bawasan na ang pag-angkat ng bigas mula sa ibang bansa na halos 2.5 milyong tonelada noong 2010 kung saan mahigit walong daang libong toneleda ang nabili ng pamahalaan at ng mga pribadong negosyante.

Sinabi pa ng kalihim na sa pamamagitan nito malaki ang posibilidad na tawaging world’s top rice importer ang Pilipinas.

www.rmn.com.ph

Read more »