Dragon Boat Team, bigo na sa Sea Games

August 26, 2011 | 3:00 PM

HINDI na makakasali sa 26th Southeast Asian Games sa Indonesia ang Philippine Dragon Boat Federation (PDBF) Team.

Ayon kay Philippine Sports Commission Chairman Richie Garcia, hindi na aabot ang Philippine Dragon Boat Team sa isusumiteng entry by names ng Philippine Olympic Committee (POC) para sa 2011 Sea Games.

Una nang inisnab ng Dragon Boat Federation ang meeting ng PSC kasama ang POC noong Miyerkules na layunin sanang mabigyang solusyon ang isyung namamagitan sa Dragon Warriors.
Gagawin ang Sea Games sa Nobyembre.

Read more »

NDRRMC: DOH nasa white alert na bilang paghahanda sa epekto ng bagyong Mina

August 26, 2011 | 12:00 NN

Patuloy na lumalakas at nananalasa sa Northern Luzon ang Bagyong Mina. Gayumpaman, inalis na ng Pagasa ang signal warning sa lalawigan ng Nueva Ecija.

Inilagay na ng Department of Health sa white alert ang kanilang Center for Health Development units sa mga lugar na maaaring daanan ni Bagyong Mina. Ayon yan sa National Disaster Risk Reduction Management Council.


Ibig sabihin ng Code White Alert, ang mga emergency medicines ay dapat na nakahanda sa emergency rooms ng mga ospital. Ang mga gamot at iba pang supply sa operating room ay dapat ng i-review at dagdagan kung kinakailangan. Ang mga serbisyong gaya ng laboratory, x-ray plates, at iba pa ay dapat nakahanda at libreng makukuha ng mga biktima ng bagyo.

Ang NDRRMC naman ay naka red alert na simula pa ng sabihin ng PAGASA na si Mina ay isa nang ganap na bagyo.

Aktibo na rin ang National Disaster Operations Center ng Philippine National Police.

Sa kanilang update, sinabi ng NDRRMC na inihanda na rin ng iba pang ahensiya ng pamahalaan ang kanilang mga gamit at tauhan upang mabilis na makaresponde sa pinsalang maaaring idulot ng bagyo.

Read more »

Bagyong Mina, isa nang typhoon at nagbabanta sa Northern Luzon

August 18, 2011 | 3:00 PM

Lalo pang lumakas at isa nang typhoon ang Bagyong Mina habang nagbabanta sa Hilagang Luzon.

Huling namataan ng PAGASA ang sentro ng bagyo sa layong 310 kilometro Silangan ng Casiguran, Aurora.

Taglay nito ang lakas ng hanging umaabot sa 120 kilometro bawat oras malapit sa gitna at pagbugsong aabot sa 150 kilometro bawat oras.

Kumikilos ito pa-Kanluran Hilagang-Kanluran sa bilis na pitong kilometro bawat oras.

Tinataya itong nasa 220 kilometro Hilagang Silangan ng Casiguran, Aurora bukas ng umaga.

Nakataas na ang babala ng bagyo bilang isa sa Northern Aurora, Isabela at Cagayan.

Patuloy namang hihigupin ng Bagyong Mina ang hanging Habagat na magdadala ng mga pag-ulan sa Southern Luzon at Visayas lalo na sa Kanlurang bahagi.

Read more »

UNICEF hanga sa Child Friendly advacacies ng Cabanatuan: Agapito naging tagapagsalita

August 25, 2011 | 5:00 PM

Hinahangan ng United Nations Children's Fund o UNICEF, gayundin ng lahat ng delegado sa Second Forum on Children in the Urban Environment ang Children's Code ng Cabanatuan City at ang implementasyon nito sa ilalim ng administrasyong Vergara.

Ginanap ang nasabing forum kahapon, sa Ateneo De Manila University, Quezon City sa harap ng mga kinatawan ng DILG, DSWD, LGUs, NGOs, at youth groups.

Bilang pangunahing author ng Children's Code at pakikipag-uganayan sa CSWDO, ang child rights advocate at dating City Councilor Raqueliza Agapito ang naglahad ng mga programa at proyekto para mapanatili ang Child Friendly City status ng Cabanatuan.

Ibinahagi ni Agapito ang ginagawa ng lungsod upang maprotektahan ang kabataan sa masasamang impluwensiya at matuon ang atensyon ng mga ito sa pag-aaral. Ibinahagi rin niya ang pagsusumikap ng CSWDO sa pagpapatupad ng Children's Code sa pamamagitan ng saturation drives. Patikular dito ang probisyong nagbabawal sa mga elementary at high school student sa paglalaro sa computer shop at iba pang recreational centers mula alas-8 ng umaga hanggang ala-5 ng hapon.

Layunin ng Second Forum on Children in the Urban Environment na maitala ang good practices ng mga LGU gaya ng sa Cabanatuan. Isasama ang mga ito sa Country Programme Action Plan for 2012 to 2016 ng administrasyong Aquino at policy interventions ng UNICEF.

BiG SOUND fm and DZXO am Newsteam

Read more »

Pinoy na iniulat na dinukot sa Libya, ninakawan ng armadong grupo

August 25, 2011 | 12:00 NN

Ligtas na sa kapahamakan ang Overseas Filipino Worker (OFW) na iniulat na dinukot sa Tripoli, Libya.

Nagkausap na sina Edwin Daproza, maintenance supervisor sa First British Engineering Company at misis nitong si Sulita na nasa Nueva Ecija.

Ikinuwento ni Daproza sa asawa ang naranasan sa kamay ng mga armadong Libyan na pumasok sa kanilang kampo.

Tinutukan aniya ng baril ang lahat ng nasa kampo kaya wala silang nagawa kundi manood na lang habang ninanakaw ang kanilang mga gamit.

Sinabi ni Daproza na natangay sa kanya ang $1,000 cash, 50 dinar at ang kanyang cellphone kaya hindi siya makontak ng mga kamag-anak.

Pero pinayagan aniya silang makaalis sa compound kaya hindi totoong dinukot siya.

Sa kabila naman ng naranasan, wala pa ring balak bumalik sa Pilipinas si Daproza dahil wala namang madadatnang trabaho rito.

Nabatid na halos 20 taon nang nagtatrabaho sa Libya si Daproza.

www.dzmm.com.ph

Read more »