Impeachment Trial - 1188 DZXO am live coverage

Live na mapapakinggan sa aming sister station, 1188 DZXO am ang Impeachment Trial kay Chief Justice Renato Corona simula alas-2 ng hapon. Mula sa Senado hanggang sa inyong radyo, ihahatid ng 1188 DZXO am ang mga pinakahuling kaganapan sa malaking bahaging ito ng ating kasaysayan.

Read more »

Ang Paglilitis Day 4: SALN ni CJ Corona, bubusisiin ngayon

Inaasahang itutuloy ngayon ng House prosecution panel at ng senator-judges ang pagbusisi sa nilalaman ng statement of assets, liabilities and net worth (SALN) ni Chief Justice Renato Corona.

Ayon kay Prosecution Spokesperson Aurora Congressman Juan Edgardo "Sonny" Angara, hindi na inaasahang paharapin pa nila si Supreme Court Clerk of Court Enriquetta Vidal matapos nitong isumite kahapon ang SALN ng punong mahistrado, gayundin ang ikalawang testigong si Marianito Dimaandal, ang hepe ng Malacañang records office.

Sa halip, plano ng prosekusyon na iharap ngayong araw ang registrar of deeds at city assessor ng anim na siyudad na kinaroroonan umano ng mga lupain at condo unit ni Corona.

Inaasahang higit walong testigo ang ihaharap ngayong araw.

Kaninang umaga, inumpisahan na ang marking ng mga ipina-subpoenang dokumento kabilang na iprinisintang ebidensya ni Dimaandal kahapon o ang mga lumang SALN ni Corona.

Sarado sa media ang pagmamarka ng mga dokumento na isinagawa sa session hall ng Senado.

Una nang iniutos kahapon ni Enrile ang maagang pagmamarka ng mga dokumentong isusumite ng mga taong sinubpoena para sa araw na ito upang mapadali ang impeachment hearing.

Read more »

Pilipinas, naungusan na ang India bilang 'largest call center agent provider' sa mundo: DOTC

Naungusan na ng Pilipinas ang India bilang nangungunang call center agent provider sa buong mundo.

Ayon sa Department of Transportation and Communications (DOTC), aabot na ngayon sa 350,000 ang call center agents sa bansa habang nasa 300,000 ang sa India noong 2011.

Dahil dito, pumapangalawa na sa Pilipinas bilang may pinakamalaking kontribusyon sa lokal na ekonomiya, ang Information Technology (IT)- Business Process Outsourcing (BPO) sunod sa remittance inflow mula sa mga overseas Filipino worker (OFW).

Sinabi ni DOTC Undersecretary Rene Limcaoco na halos masungkit na ng BPO industry ang $9 bilyong export revenue nitong 2011 o katumbas ng 4.8% sa Gross Domestic Product (GDP).

Kapag nagpatuloy aniya ang mabilis na agos ng kita sa BPO Industry, hindi malayong makakamit ang $11 bilyong target ngayong taon at pagsapit ng 2016 ay halos kapantay na nito ang OFW remittances na $25 bilyon.

Read more »