BSP, ipinaliwanag ang kanilang mahalagang papel sa ekonomiya ng bansa

Nagsagawa kahapon ang Bangko Sentral ng Pilipinas ng isang seminar na nagpapaliwanag sa mahalagang papel na ginagampanan ng ahensiya sa ekonomiya ng bansa.

Sa tawag na “Be up to SPeed on BSP”, ang naturang seminar ay ginanap sa Plaza Leticia, Cabanatuan City at dinaluhan ng humigit kumulang sa 300 partisipantes mula sa iba’t-ibang sektor.

Ipinaliwanag ng mga tagapagsalita na mula pa sa BSP national office ang tatlong suhay o pillar ng BSP: ang price stability, financial stability, at efficient payment and settlement system.

Sa parehong okasyon ay muling ipinakilala ang bagong anyo ng Philippine currency na tinatawag ding New Generation Currency.

Ang Be up to SPeed on BSP ay bahagi ng kanilang serye ng mga aktibidades sa ilalim ng kanilang Economic and Financial Learning Program para sa mga mamamayan.

Kaugnay niyan ay inilunsad din sa BSP Cabanatuan Branch ang Economic and Financial Learning Center o EFLC. Panauhing pandangal sa okasyon si Monetary Board Member Ignacio Bunye. Ang EFLC na nasa ikalawang palapag ng BSP Cabanatuan, ay libreng binubuksan para sa mga mag-aaral at mananaliksik sa aspetong pang-ekonomiya at pampinansiyal.