Pag-iingat, tamang paggamit ng Facebook, iba pang social networking sites

June 22, 2011 | 5:00 PM

Nais ng ilang kongresista na isama ng Department of Education ang pagtuturo sa mga estudyante sa pampublikong paaralan sa elementary at high school ang pag-iingat at tamang paggamit ng mga social networking site.

Ayon kina Marikina City Rep. Miro Quimbo at Aurora Rep Juan Edgardo Angara, kailangang magabayan ang mga kabataan sa paggamit ng mga social networking sites dahil ginagamit na rin ito ng mga kriminal para makapambiktima.

Idinagdag ng kongresista na habang bata pa ay mabuting maituro na rin sa mga mag-aaral kung paano magiging responsible sa paggamit ng mga social networking site, partikular ang sikat na Facebook.

Sinabi ni Quimbo na kailangang kumilos ang pamahalaan para matiyak ang kaligtasan ng mga kabataan sa paggamit ng modernong teknolohiya.

Batay sa isinagawang survey ng AGB Nielsen, ang Pilipinas ay pang-lima sa mga bansa na may pinakamaraming gumagamit ng Facebook.

Para naman kay Angara, magandang lugar ang mga paaralan upang maituro sa mga kabataan ang kahalagahan sa paggamit ng modernong teknolohiya at kung ano ang mga bagay na hindi dapat gawin sa mga social networking site.

wwww.gmanews.tv