Mga tricycle operators sa Reg III, may P33-M fuel aid

May 10, 2011 | 12:00 nn

Magandang balita para sa mga tricycles driver at operator.

Ang Department of Interior and Local Government ay naglaan ng 33 million pesos para sa mga tricycle operators sa buong Region 3. Pinakamalaking bahagi ito ng inilabas na pondong 134.4 million pesos sa programang “Pantawid Pasada” para sa public transport sector sa bansa.

Mula sa 33 million pesos na ito, makakatanggap ng one-time subsidy na 150 pesos bawat isa ang may 221,392 na tricycle operators sa buong Region 3 na napapaloob sa Executive Order Number 32 na nilagdaan ni Pangulong Aquino.

Ayon kay DILG Provincial Director Abraham Pascua, may 49,061 tricycle franchise owners sa Nueva Ecija.  Diin ni Dir. Pascua, ang bilang na ito ng tricycle with franchise sa ating probinsya ay sasailalim pa sa masusing scrutiny at validation. Sa taya rin nya, kung walang magiging aberya, maipapatupad at maipapamahagi ang “Pantawid Pasada” sa mga lehitimong tricycle operators ngayong linggo.

Ang mga local chief executive o mga mayor ang inaasahang mamamahagi sa fuel subsidy.

Ayon kay Interior Secretary Jesse Robredo, ang pondo ay ipinamahagi sa 16 na DILG regional offices. Sila ay inatasang makipag-ugnayan sa mga local government units para sa maayos na pamamahagi ng fuel subsidy sa may 900,000 rehistradong tricycle operator sa bansa.

Inenganyo naman ni Secretary Robredo ang mga lokal na pamahalaan na magbigay ng counterpart funding upang madagdagan ang 150-peso fuel subsidy at matulungan ang mga tricycle franchise owner na dumadaing sa tumaas na presyo ng langis.

Dagdag pa ng kalihim, bagamat inaasahang bababa ang presyo ng langis ngayong lingo, ang fuel subsidy ay lubos na makakatulong sa mga tricycle driver na umaasa lamang sa boundary bawat araw, para masuportahan ang kanilang pamilya.

Reports from Marlon Ramos and Cynthia D. Balana